Ruta ng Galaxy Manila Marathon sa June 12 isinapinal na

Isinapinal na ng mga organizer ng Galaxy Manila Marathon, sa pangunguna ni Runrio Inc. Coach Rio dela Cruz, ang ruta para sa nasabing marathon na sisimulan ng alas-11:30 ng gabi ng June 12 para sa 42 kilometer race category.

Sa pulong kasama ang mga stakeholder at lokal na pamahalaan na madadaanan ng ruta mula SM Mall of Asia hanggang SM City North EDSA (northbound at southbound), tinalakay at hinimay ang mga dapat na ayusin para sa mas maayos at ligtas na pagtakbo ng mga race runner.

Gagamitin ng mga partisipante sa 42km race ang EDSA bilang main race route. Mula SM MOA hanggang Buendia MRT ay gagamitin ng mga tatakbo ang bus lane (inner lane) habang mula Buendia MRT Station hanggang Quezon City Academy (SM North Annex) U-turn slot ay gagamitin naman ang dalawang lane na katabi ng bus lane.

Magsisilbing temporary EDSA bus carousel lane mula SM MOA at Buendia MRT Station ang outermost lane o ang lane na katabi ng bangketa/sidewalk. Wala namang magiging adjustment sa puwesto ng bus lane mula Buendia MRT Station hanggang Caloocan.

Pansamantala namang isasara ang Magallanes flyovers (both bounds) habang paparating ang mga participant. Muling bubuksan ang bawat section nito kapag nakadaan na ang pinakahuling runner.

Magpapatupad din ng Stop and Go scheme sa mga EDSA bus na mula PITX at papuntang SM MOA.

Hinihikayat naman ang lahat ng maaapektuhan na gumamit ng perpendicular road or dumaan sa mga Mabuhay Lane.

Sinabi naman ni MMDA Chairman Atty. Don Artes na nakahanda ang mobile pumps ng ahensiya kung kailanganin. Hiningi rin niya ang assistance ng DPWH dahil inaasahang maulan sa nasabing araw ng marathon. (Bhelle Gamboa)