Kapakanan ng consumers naisantabi dahil inuna ang rigodon sa Senado – Diokno

Naantala ang pagdinig ng Senado kaugnay sa mataas na singil sa kuryente dahil sa nangyaring palitan ng liderato.

Ayon kay Akbayan Partylist Rep. Chel Diokno, dahil sa agawan ng silya sa senado, naisantabi na naman ang kapakanan ng taumbayan.

Dapat ay isasagawa aniya ang joint hearing ng Senate Committees on Ways and Means, Energy, at Public Services para talakayin ang mataas na singil sa kuryente subalit nakansela ito.

Kaugnay nito ay nanawagan si Diokno sa Kamara na magktakda na ng pagdinig sa inihaing resolusyon ng Akbayan Reform Bloc na humihiling na imbestigahan ang mataas na power bills at ang ang iba’t ibang charges na ipinapasa sa consumers.

Sa nasabing resolusyon nais ng Akbayan na mapag-aralan ang ipinatutupad na pass-through charges ng mga distribution utilities kabilang ang Lifeline Subsidy charge. (DDC)