36 suspek naaresto ng SPD, higit ₱1.6M na halaga ng ilegal na droga nakumpiska

Nagpapatuloy ang maigting na pagpapatupad ng batas sa katimugang Metro Manila sa pangunguna ng Southen Police District (SPD) sa ilalim ng liderato ni District Director, BGen Glenn Oliver C. Cinco upang panatilihin ang kaligtasan ng publiko at kaayusan sa komunidad.

Nagresulta ito sa pagkaaresto ng kabuuang 36 na indibiduwal kabilang ang isang Top Most Wanted Person, dalawang Most Wanted Persons, at tatlong iba pa na pinaghahanap ng batas, sa isinagawang 24-oras na agresibong operasyon ng otoridad sa nasasakupang lugar at nakumpiska ang 216.75 na gramo ng shabu at 1 kilo ng marijuana o MJ vape oil na nagkakahalaga ng ₱1,613,900.00.

Kasama sa operasyon ang anti-illegal gambling campaign at implementasyon ng firearms laws. Bukod dito, nagpatupad din ng istriktong lokal na mga ordinansa na nagresulta ng pagkahuli ng kabuuang 2,595 indibiduwal dahil sa iba’t ibang paglabag kung saan umabot sa ₱642,000.00 na koleksiyong multa na katunayang naninindigan ang SPD sa tuloy-tuloy na disiplina, pagsunod at kaayusan ng publiko.

“Lubos akong nagpapasalamat sa ating mga masisipag na police personnel ng SPD sa kanilang patuloy na dedikasyon at serbisyo para sa publiko. Patuloy po ang ating pinaigting na operasyon laban sa lahat ng uri ng kriminalidad. Hindi po tayo titigil hangga’t hindi natin napapanatili ang ligtas, maayos, at mapayapang komunidad para sa ating mga kababayan. Asahan po ninyo ang mas pinaigting pang presensya ng kapulisan sa lansangan,” pahayag ni BGen Cinco.(Bhelle Gamboa)