Bleu Hotel ipinasara ng Pasig City LGU

Ipinag-utos ng Pasig City government ang pagpapasara sa Bleu Hotel na ino-operate ng kumpanyang Zerrin Development Corporation dahil sa umano ay mga ilegal na aktibidad.

Sa kopya ng closure order ng Pasig City LGU, binanggit ang operasyon na ikinasa ng National Bureau of Investigation kung saan natuklasan ang mga paglabag kabilang ang human trafficking.

Ayon sa City Government, habang nakabinbin pa ang reklamo na inihain ng NBI sa piskalya ay ipinasara na lang muna ang hotel.

Ang nasabing hotel ay una nang iniugnay ng NBI sa pamilya ni dating AnaKalusugan party-list Rep. Mike Defensor.

Ayon kay NBI Director Melvin Matibag, ang asawa ni Defensor na si Julie at kanilang anak ang nagmamay-ari ng hotel.

Kasama din ang mag-ina sa sinampahan ng reklamo sa piskalya. (DDC)