2 HVIs timbog sa Parañaque drug bust halos P4M halaga ng shabu nakumpiska

Naaresto ng mga operatiba ng Station Drug Enforcement Unit (SDEU) ng Parañaque City Police Station, Southern Police District (SPD) ang dalawang High Value Indibiduals (HVIs) at nakumpiska ang tinatayang 550 na gramo ng umano’y shabu na nagkakahalaga ng ₱3,740,000.00 sa ikinasang anti-illegal drug operation sa Barangay San Isidro sa nasabing lungsod kaninang madaling araw.

Kinilala ni Col Nicolas S. Piñon, hepe ng Parañaque CPS, ang mga naarestong suspek na sina alyas “Toto,” 52-anyos, at alyas “Ronnie,” 53-anyos, kapwa nakatira sa Brgy. Manuyo Dos, Las Piñas City.

Bukod sa umano’y ilegal na droga narekober ng otoridad ang eco bag; cellular phone; at buy-bust money.

Nasa kustodiya ng pulisya ang dalawang suspek at nakatakdang sampahan ng kasong paglabag sa Comprehensive Dangerous Drugs Act of 2002 sa Parañaque City Prosecutor’s Office.

Binigyang-diin ni SPD District Director BGen Randy Y. Arceo ang pinaigting na hakbang ng distrito na labanan ang ilegal na droga at pinuri nito ang operating units sa matagumpay na pagsasagawa ng operasyon.

“The success of this operation shows how committed we are to removing illegal narcotics from our communities. We will continue to step up our efforts to ensure that individuals involved in the illegal drug trade are held accountable for their actions,” ayon kay BGen Arceo. (Bhelle Gamboa)