Publiko pinagtitipid sa konsumo sa kuryente ngayong ganap nang nagsimula ang summer

Kasabay ng deklarasyon ng PAGASA sa pormal na pagsisimula ng panahon ng tag-init sa bansa, hinikayat ng Meralco ang publiko na maging matipid sa paggamit ng kuryente.

Kapag ganitong panahon, normal nang tumataas ang demand sa kuryente na nangangahulugan din ng pagtaas ng konsumo at bayarin.

Ayon sa Meralco, ngayong nagsimula na ang summer season, dapat maging masinop at matalino sa paggamit ng kuryente.

Mas kinakailangan ngayon ang pagtitipid ayon sa Meralco lalo at nagpapatuloy pa ang tensyon sa Gitnang Silangan.

Una nang inanunsyo ng Meralco ang posibleng pagtaas ng bayarin sa bill sa buwan ng Abril.

Dahil kasi sa global crisis ay humina ang piso kaya mas magmamahal ang kuryente. (DDC)