MMDA ikakasa ang tuloy-tuloy na paglilinis sa mga estero bago ang tag-ulan

Nagkasa ang Metropolitan Manila Development Authority ng “Bayanihan sa Estero” sa Talon Creek sa Barangay Talon 4, Las Piñas City.

Katuwang ng MMDA sa operasyon ang lokal na pamahalaan ng Las Piñas sa pangunguna nina Mayor April Aguilar at Congressman Mark Anthony Santos.

Sa isinagawang operasyon, nakahakot ng iba’t ibang uri ng basura tulad ng burak, plastic waste, styrofoam, mga sanga ng puno, at iba pang solid waste na nagdudulot ng pagbabara at pag-apaw ng tubig.

Sinabi ng MMDA na batay sa direktiba ni Pangulong Ferdinand Marcos Jr. dapat paigtingin ang kanilang mga flood control initiatives bilang paghahanda sa tag-ulan.

Target ng MMDA na maikasa ang tuloy-tuloy na paglilinis ng estero sa loob ng isang buwan, kung saan tututukan ang pagpapalalim sa mga creek ng hanggang tatlong metro upang mapataas ang kapasidad nito at mas mapabilis ang daloy ng tubig.

Layunin ng mga hakbang na ito na maiwasan ang pagbaha, mapanatili ang maayos na daloy ng tubig, at maprotektahan ang kaligtasan ng mga residente sa komunidad. (Bhelle Gamboa, DDC)