Embahada ng Pinas inaalam na ang sitwasyon ng mga Pinoy na inaresto sa Dubai

Nakikipag-ugayan na sa Dubai authorities ang embahada at konsulada ng Pilipinas kaugnay sa ulat na may mga Pinoy na kabilang sa naaresto dahil sa pag-post at pagbahagi ng videos online na nagpapakita ng mga pag-atake at air defense interceptions sa Dubai.

Partikular na aalamin ng mga opisyal ng embahada ng Pilipinas ang pagkakakilanlan at status ng mga Pinoy.

Sinabi ng Philippine Embassy at ng Consulate General na inirerespeto nito ang soberanya ng UAE at ang kapangyarihan nitong ipatupad ang national security, cybercrime, at public order laws.

Ayon sa embahada, paulit-ulit naman ang paalala sa publiko ng UAE authorities na hindi dapat isinasapubliko ang mga misleading o fabricated security related content.

Muli ring inabisuhan ng embahada ang mga Pinoy sa UAE na maging maingat at maging responsable sa paggamit ng kanilang social media at messaging platforms. (DDC)