Suplay sa ilalim ng “Benteng Bigas Meron na Program” sapat ayon sa DA

Sa kabila ng pagtaas ng presyo ng produktong petrolyo at ng pangunahing bilihin, tiniyak ng Department of Agriculture na sapat ang suplay ng bigas sa ilalim ng “Benteng Bigas Meron na Program”.

Ayon kay Agriculture Secretary Francisco Tiu Laurel Jr. patuloy ang pag-replenish ng National Food Authority sa suplay ng bigas.

Binabantayan din ang imbentaryo sa mga Kadiwa Program Centers at iba pang distribution sites.

Kaugnay nito ay Nanawagan si Tiu Laurel sa publiko na huwag mag-panic buying ng bigas.

Nitong nagdaang mga araw kasi sinabi ng kalihim na dumarami ang mga nagtutungo sa Kadiwa Centers para bumili ng murang bigas dahil sa pangambang mauubusan na ng suplay.

Patuloy na ipinatutupad ng DA ang limit na 10 kilograms per day para sa mga benepisyaryo ng Bente Pesos per Kilo na bigas. (DDC)