5 Vietnamese na sangkot sa pagbebenta ng dog meat timbog ng NBI

Natimbog sa ikinasang operasyon ng National Bureau of Investigation ang limang Vietnamese nationals dahil sa pagbebenta ng dog meat sa Pasay City at sa Makati City.

Nagsagawa ng imbestigasyon ang NBI matapos matanggap ang intelligence report na ginagawa ang bentahan ng dog meat gamit ang online messaging platforms.

Sa ikinasang test-buy ng NBI, isang nagpanggap na buyer ang bumili sa mga suspek at nai-deliver naman sa pamamagitan ng third party courier ang kanilang binili.

Kinumpirma din ng National Meat Inspection Service sa pamamagitan ng forensic examination na karne nga ng aso ang ibinebenta ng mga suspek.

Doon na nagkasa ng entrapment operation ang NBI na nagresulta sa pagkakaaresto ng mga dayuhang suspek.

Ipinagharap na sila ng reklamong paglabag sa Meat Inspection Code of the Philippines, Animal Welfare Act of 1998, Anti-Rabies Act of 2007, at Food Safety Act of 2013. (DDC)