Pagpapalakas sa ICS tinalakay ng MMDA

Nagpulong ang mga opisyal ng Metropolitan Manila Development Authority (MMDA) sa pangunguna ni Public Safety Division Director Atty. Crisanto Saruca upang palakasin ang kanilang kaalaman hinggil sa Incident Command System (ICS) at ang mahalagang papel nito sa epektibong pamamahala at pagtugon sa mga insidente at sakuna sa Metro Manila.

Pinag-usapan ang kahalagahan ng isang malinaw at organisadong sistema ng pamumuno at koordinasyon sa oras ng emergency, kabilang ang mabilis na pagpapalitan ng impormasyon, wastong pagdedesisyon, at maayos na pagtutulungan ng iba’t ibang ahensya ng pamahalaan.

Binigyang-diin ang mga tungkulin at responsibilidad ng bawat responder at opisyal sa panahon ng operasyon. Sa pamamagitan nito, inaasahang magiging mas mabilis, maayos, at episyente ang pagtugon para sa kaligtasan ng publiko.

Tinalakay din ang mga hakbang at protocol na dapat isagawa ng bawat opisina sakaling magkaroon ng earthquake at fire incident. Kabilang dito ang wastong evacuation procedures, pagtukoy sa mga assembly areas, at ang kani-kaniyang tungkulin ng bawat tanggapan upang matiyak ang kaligtasan ng mga empleyado at ng publiko.

Layunin ng naturang pagpupulong na higit pang mapalakas ang kahandaan ng MMDA sa pagharap sa iba’t ibang uri ng emergency at sakuna, kasabay ng patuloy na pagpapabuti ng koordinasyon at disaster response sa buong Metro Manila. (Bhelle Gamboa)