Pangalan ni DILG Sec. Jonvic Remulla ginagamit sa paghingi ng tulong-pinansyal

Pinag-iingat ng Department of the Interior and Local Government ang publiko laban sa scammer na gumagamit ng pangalan ni Secretary Jonvic Remulla para makapanloko.

Ayon sa DILG, nakatanggap sila ng report na ginagamit ang pangalan ng kalihim at tinatawagan ang ilang public officials para humingi ng financial assistance para matulungan umano ang mga biktima ng sunog sa Bocaue, Bulacan.

Paglilinaw ng DILG, ang nasabing mga tawag ay hindi galing sa tanggapan ng kalihim.

Hindi rin umano kailanman magso-solicit ng financial assistance si Remulla.

Kaugnay nito ay mahigpit na pinaalalahanan ng DILG ang mga public official na huwag i-entertain sakaling makatanggap ng ganitong tawag at agad din itong i-report sa kinauukulan. (DDC)