Training center ng Las Piñas tumanggap ng kasangkapan at kagamitan mula sa TESDA

Tumanggap ang Las Piñas City Manpower Training Center (LPCMTC) ng mga kasangkapan at kagamitan matapos lagdaan ang Deed of Donation para sa mga tool kits na ito na ipinagkaloob ng Technical Education and Skills Development Authority- National Capital Region (TESDA-NCR) at TESDA MuntiParLas Tapat District.

Dumalo si Mayor April Aguilar kasama sina Angelina Carreon, Regional Director ng TESDA-NCR; Gerardo Mercado, District Director ng TESDA MuntiParLas Tapat District at Assistant Regional Director ng TESDA-NCR; at Engr. Noel Cuevas, LPCMTC Head.

Kasunod ng pormal na donasyon ay ang awarding ng mga kagamitan na gagamitin sa iba’t ibang kurso ng LPCMTC partikular para sa assembling electronic products, solar night at post lamps, automotive servicing, cookery, bread making, at pagse-service ng consumer at industrial electronics modules at systems. Mayroon ding kagamitan para sa paghahanda ng hot at cold meals.

Sa pamamagitan ng mas maayos na training facilities at kumpletong kagamitan, mas napapalakas ang kakayahan ng mga Las Piñero na magkaroon ng trabaho o magsimula ng sariling hanapbuhay.

Sa Las Piñas, hindi lang diploma ang target kundi mga kakayanan na may kasamang kagamitan, training na mayroong direksyon, at kabuhayan na may konkretong suporta ang tunay na layunin. (Bhelle Gamboa)