BFAR Aircraft ilang ulit niradyohan ng barko ng China sa Bajo de Masinloc

Nagsagawa ng Maritime Domain Awareness ang Philippine Coast Guard at Bureau of Fisheries and Aquatic Resources sa Bajo de Masinloc gamit ang BFAR aircraft.

Ayon kay Coast Guard Spokesperson for the West Philippine Sea Commodore Jay Tarriela, dalawampu’t walong beses nagkasa ng radio challenges ang barko ng People’s Liberation Army-Navy na may hull number 553.

Propesyonal namang tumugon ang mga crew ng BFAR aircraft at iginiit na nakabatay sa international law ang pagsasagawa nito ng routine MDA flight.

Sa kasagsagan ng pagpapatrolya sinabi ni Tarriela na namataan din sa Bajo de Masinloc ang isang unidentified fighter jet.

May nakita ding dalawang Chinese floating buoy sa Bajo de Masinloc.

Ayon kay Tarriela magpapatuloy ang regular at lawful maritime patrols ng PCG at ng BFAR sa katubigan na nasa Exclusive Economic Zone ng bansa para matiyak ang proteksyon ng mga mangingisdang Pinoy. (Dona Dominguez-Cargullo)