Col. Delos Santos bagong hepe ng Las Piñas City Police Station

May bago ng hepe ang Las Piñas City Police Station sa katauhan ni Colonel Wilson O. Delos Santos.

Pinangunahan ni Southern Police District (SPD) District Director, Brigadier General Randy Y. Arceo ang Turnover of Office Ceremony ng Las Piñas CPS bilang bahagi ng maayos na pagpapalitan ng pamumuno sa hanay ng pulisya.

Pormal na isinalin ang tungkulin ng Chief of Police (COP) ni outgoing Col Sandro Jay DC Tafalla kay Col. Delos Santos matapos ang dalawang taon na serbisyo nito bilang hepe ng pulisya sa lungsod.

Dumalo bilang Guest of Honor and Speaker si Mayor April Aguilar, bilang pagpapakita ng patuloy na suporta ng Pamahalaang Lungsod sa kapulisan at sa adhikaing mapanatili ang kaayusan, disiplina, at kaligtasan sa lungsod. Lubos ang pasasalamat ni Mayor April kay Col. Tafalla para sa kanyang malaking ambag sa kaligtasan at kaayusan ng lungsod.

Binigyang-diin ni Mayor April ang kahalagahan ng nagkakaisang serbisyo, maayos na pamamahala, at matibay na ugnayan ng lokal na pamahalaan at ng Philippine National Police.

Ang naturang turnover ay sumasalamin sa paninindigan ng Las Piñas sa propesyonalismo at responsableng pamumuno, bilang pundasyon ng isang ligtas at maayos na komunidad. (Bhelle Gamboa)