Opisyal ng DepEd sa MIMAROPA guilty sa items-for-sale

Sinibak sa serbisyo ang isang Schools Division Superintendent ng Region IV-A o MIMAROPA matapos mapatunayang sangkot ito sa items-for-sale scheme.

Ayon sa Department of Education ibinaba na ng Malakanyang ang kautusan kung saan napatunayang guilty ang opisyal sa patung-patong na kaso gaya ng “dishonesty”, “grave misconduct and oppression”, “Receiving for Personal Use of a Fee or Gift” at “Conduct Prejudicial to the Best Interest of the Service”.

Maliban sa pagsibak sa serbisyo, kanselado na din ang eligibility ng sangkot na opisyal, forfeited na ang kaniyang retirement benefits, at bawal na siyang magtrabaho sa gobyerno.

Noong buwan ng Agosto, iniulat ng DepEd ang pagkakasangkot ng tatlong opisyal sa Palawan sa pagtanggap o pagkulekta ng pera kapalit ng approval sa appointments, paglilipat at promosyon ng mga guro sa nasabing lalawigan. (DDC)