Koordinasyon ng PNP at BOC kontra smuggling mas paiigtingin pa
Isolated incident lamang ang nangyaring raid ng PNP-HPG sa warehouse sa Bulacan kung saan nadatnan ang mga tauhan ng Bureau of Customs.
Sa kabila nito sinabi ni Customs Commissioner Ariel Nepomuceno na suportado niya ang mga tauhan ng Customs na gumaganap lamang sa kanilang tungkulin.
Kasabay nito sinabi ng Customs chief na ang naturang insidente ay hindi dapat maging rason para mabahiran ang matibay na ugnayan ng PNP at BOC.
Ayon kay Nepomuceno, ang naturang insidente ay gagamiting oportunidad para mas mapalakas pa ang koordinasyon at mapabuti ang operational protocols sa pagitan ng dalawang ahensya upang maiwasan nang maulit pa ang nangyari.
Patuloy aniyang makikipagtulungan ang BOC sa PNP sa paglaban at pagsawata sa smuggling. (DDC)
