DOLE naghain ng apela sa korte sa hinarang na wage increase sa Metro Manila

Tuloy ang laban ng pamahalaan para sa dagdag-sahod ng mga manggagawa sa Metro Manila matapos maghain ng apela ang Department of Labor and Employment (DOLE) sa korte ngayon.

Pormal nang nagsumite ng Motion for Reconsideration si DOLE Secretary Francis Tolentino sa Pasig Regional Trial Court Branch 152.

Ito ay para ihirit na bawiin ang inilabas na writ of preliminary injunction na pumipigil sa pagpapatupad ng Wage Order na nagkakaloob ng 85-peso wage hike sa National Capital Region.

Ayon kay Tolentino, walang hurisdiksyon ang korte sa usapin at bigo ang mga petitioner na dumaan sa tamang administrative process.

Batay sa Labor Code, ang anumang apela sa mga kautusang may kaugnayan sa pasahod ay dapat dalhin sa National Wages and Productivity Commission at bawal maglabas ang mga korte ng anumang pigil-atas o injunction laban dito.

Sinabi ng DOLE Na dumaan sa legal at tamang tripartite process ang wage order alinsunod na rin sa utos ni Pangulong Ferdinand Marcos Jr. na itaguyod ang dignidad ng mga manggagawa.

Sakaling maipatupad, nasa 1.1 milyong minimum wage earners sa Metro Manila ang makikinabang sa dagdag na kita para matugunan ang mataas na gastusin sa pamumuhay. (DDC)