WorldSkills Philippines Clark 2026 inilunsad ng TESDA

Inilunsad ngayon ng Technical Education and Skills Development Authority (TESDA) ang WorldSkills Philippines Clark 2026 bilang hudyat ng pagsisimula ng premyadong skills competition para tukuyin ang susunod na grupo ng FIlipino champions na kakatawan sa bansa sa mga idaraos na international skills competitions.

May temang, “Your Skills, Your Future”, ang WorldSkills Philippines Clark 2026 ay nagbibigay-diin sa ginagampanang papel ng technical skills sa paghubog ng magandang karera sa hinaharap, na naghahanda sa kabataang Pilipino upang kayaning makipagsabayan sa mga manggagawa sa buong mundo.

Isasagawa ang skills competition sa September 7-11, 2026 sa Clark Freeport Zone sa Pampanga.Lalahok dito ang 350 na competitors mula sa 18 regional offices ng TESDA, na nanalo sa idinaos na Regional Skills Olympics.

“This competition is a showcase of technical excellence. Through WorldSkills, young Filipinos have a platform to demonstrate their world-class skills and prove that Filipino talent can compete and excel on the global stage,” ayon kay TESDA Secretary Kiko Benitez.

Dating kilala bilang Philippine National Skills Competition, ang ngayo’y WorldSkills Philippines ay nagtataglay ng pamantayan at balangkas ng WorldSKills International. Ang pagpapalit ng katawagan ay nagpapatunay sa layunin ng TESDA na itaas ang kalidad ng technical vocational education and training (TVET) at tiyaking taglay ng mga manggagawang Pilipino ang kasanayan para makipagkumpetensya saan man sa mundo.

Magtatagisan ang mga kalahok para makuha ang parangal sa 30 skill areas, kabilang na ang Construction and Building Technology, Manufacturing and Engineering Technology, Information and Communication Technology, Creative Arts and Fashion, Social and Personal Services at Transportation and Logistics.

Bukod sa pagkilala sa kahusayang teknikal, ang WorldSkills Philippines Clark 2026 ay naglalayong isulong ang kalidad, pagiging produktibo, pagbabago at kaugnayan sa industriya ng TVET sa Pilipinas, pagkukumpara ng kasanayan ng Pilipino sa pandaigdigang pamantayan, nagpapatibay sa pagkakasama ng pamahalaan at industriya, at pagtukoy sa pinakamagagaling na talento ng bansa upang kumatawan sa Pilipinas sa mga rehiyunal at pandaigdigang kumpetisyon ng WorldSkills.

Ang kaganapan ay kasunod ng matagumpay na pagdaraos ng 14th WorldSkills ASEAN Competition sa bansa at ng magandang ipinamalas na rekord ng mga kababayang nagwagi, patunay na nangunguna ang Pilipinas sa rehiyon pagdating sa kahusayan sa skills.

Kasama rin sa isang linggong kaganapan ang seremonya ng pagbubukas, mga kumperensya, mga eksibit, kultural na pagtatanghal at ang General Assembly ng WorldSkills Philippines kung saan magsasama-sama ang mga lider ng industriya at edukasyon, mga tagasanay, mga kapartner ng pamahalaan at mga ekspertong teknikal para isulong ang adyenda ng bansa para sa pag-unlad ng mga kasanayan.

Ang WorldSKills Philippines ay pinamumunuan ng TESDA na nagsisilbing opisyal na lupon para sa pambansang kumpetisyon ng kasanayan. Ang mga mananalo ng medalyang ginto at pilak ang pipiliin para kumatawan sa bansa sa WorldSkills International, WorldSkills Asia at WorldSkills ASEAN, kung sa an makakaharap nila ang mga pinakamagagaling sa buong mundo.

Ang pagdaraos ng WorldSkills Philippines Clark ay alinsunod sa Section 30 ng Republic Act No. 7796 o ang TESDA Act of 1994, na nagbibigay kautusan sa pagdaraos ng taunang kumpetisyon sa kasanayan upang isulong ang kalidad na pagsasanay at ihanda ang talentong Pilipino para sa pandaigdigang kumpetisyon.

Nabatid na ang kumpetisyon sa kasanayang ito ay bilang pagsunod sa direktiba ni Pangulong Ferdinand R. Marcos Jr. na sanayin ang mga Pilipinong manggagawa upang maging handang makipagsabayan sa buong mundo, taglay ang kasanayang kailangan ng industriya, at nag-aangat sa TVET ng bansa sa pandaigdigang pamantayan. (Bhelle Gamboa)