Ayuda sa mga OFW tuloy-tuloy sa ilalim ng UPLIFT

Nakatanggap ng tulong-pinansyal mula sa Agarang Kalinga at Saklolo para sa mga OFWs na Nangangailangan (AKSYON) Fund ng Department of Migrant Workers Regional Office 3 (DMW-RO3) ang 30 na overseas Filipino workers (OFWs) na kauuwi lamang sa bansa dahil sa iba’t ibang uri ng krisis at emerhensya.

Ang nasabing ayuda ay nakapaloob sa Unified Package for Livelihoods, Industry, Food, and Transport (UPLIFT) Assistance Program na inilunsad ni Pangulong Ferdinand R. Marcos Jr. Pinangunahan mismo ni Migrant Workers Secretary Hans Leo J. Cacdac ang pamamahagi ng pondo na ginanap sa San Fernando City, Pampanga nitong Hulyo 28.

Nagmula ang mga benepisyaryong OFW sa iba’t ibang bansa tulad ng Saudi Arabia, Kuwait, United Arab Emirates (UAE), at Hong Kong. Sa kabuuang bilang, 13 rito ang napilitang umuwi dahil sa mga kondisyong medikal habang ang iba naman ay naging biktima ng pang-aabuso, paglabag ng employer sa mga probisyon ng kontrata, at human trafficking.

Pinaalalahanan ni Secretary Cacdac ang mga OFW na gamitin sa maayos at produktibong paraan ang natanggap na tulong. Muling binigyang-diin ng Kalihim ang layunin ng programa para sa mga nagbalik-bayan.

“Ang layunin ng pagbibigay ng benepisyong ito ay maitawid kayo pagkatapos ng inyong karanasan sa abroad at mabigyan kayo ng bagong panimula. Pahalagahan ninyo ang pera, ito naman ay hindi utang na loob sa amin, basta’t pahalagahan at ingatan lamang ninyo,” pahayag ni Secretary Cacdac sa kanila.

Bukod sa cash assistance mula sa AKSYON Fund, isinailalim muna sa isang Financial Literacy Seminar ang mga OFW upang mabigyan sila ng tamang kaalaman sa wastong paghawak, pagtitipid, at pagpapalago ng kanilang natanggap na ayuda. (Bhelle Gamboa)