China naglunsad ng rocket; debris posibleng bumagsak sa katubigan ng Northern Luzon

Kinumpirma ng Philippine Space Agency ang paglulunsad ng China ng Yinli-1 Rocket mula sa East China Sea.

Ayon sa abiso ng PhilSa, isinagawa ang rocket launch bago mag alas onse ng umaga at ang debris mula dito ay posibleng bumagsak sa katubigan ng Northern Luzon.

Kabilang sa tinukoy na drop zones ng debris ay sa bahagi ng Babuyan Island at sa Sta. Ana, Cagayan.

Sinabi ng PhilSa na ang debris mula sa rocket ay delikado sa mga dumaraang barko, eroplano, mga mangingisda at iba pang sasakyang pandagat.

Pinayuhan din ng PhilSa ang mga residente sa lugar na agad iulat sa mga otoridad sakaling may makita silang hinihinalang rocket debris. (DDC)