One-time P2,000 Uplift Assistance sa 4Ps at Walang Gutom beneficiaries sisimulang ipamahagi ngayong buwan
Target ng Department of Social Welfare and Development na masimulan bago matapos ang buwan ang pamamahagi ng dagdag na tulong para sa 4Ps at Walang Gutom beneficiaries sa ilalim ng UPLIFT assistance ng pamahalaan.
Ayon kay DSWD Secretary Rex Gatchalian, maliban sa halaga ng natatanggap na allowance ng mga 4Ps member, makatatanggap sila ng one-time cash assistance na nagkakahalaga ng 2,000 pesos.
Para sa mga benepisyaryo ng 4Ps, ibibigay ang tulong-pinansyal sa pamamagitan ng kanilang LANDBANK cash card o registered e-wallet.
Kung bagong registered beneficiaries lamang, ibibigay ang tulong via over-the-counter payout.
Para sa mga benepisyaryo ng Walang Gutom Program, isasabay ang manual payout sa kanilang food redemption activity.
Paalala ni Gatchalian, hindi kailangang magrehistro o magbayad para sa UPLIFT Assistance. (DDC)
