DOH umapela sa mga magulang na huwag maniwala sa misinformation sa deworming program

Kasunod ng insidente ng pagkasawi ng isang bata sa Cavite matapos ang deworming activity sa kanilang paaralan, may paalala ang Department of Health sa mga magulang.

Ayon sa DOH, dapat patuloy na suportahan ang nagpapatuloy na nationwide deworming activities dahil nananatili itong ligtas, epektibo at napatunayan nang nakapagbibigay proteksyon sa mga bata.

Paalala ng ahensya, iwasang maniwala sa mga hindi beripikadong report o post tungkol sa epekto ng deworming.

Ipinaliwanag ng ahensya na ang mga bata ay prone sa intestinal worms at kung hindi ito maaagapan, maaari itong magresulta sa malnutrisyon, anemia, delayed learning, at mahinang immune system.

Sinabi ng ahensya na ang gamot para sa deworming program ay halos tatlong dekada ginagamit ng DOH at rekomendado ng World Health Organization.

Nagdudulot lamang ito ng temporary side effects sa ilang mga bata gaya ng pananakit ng tyan, pagsusuka, lagnat, pagdudumi o skin rashes.

Pinaalalahanan na g ahensya ang mga health worker at LGU na istriktong sundin ang safety protocols sa pagsasagawa ng school-based at community-based deworming activities. (DDC)