Coast Guard naka-heightened alert na dahil sa Super Typhoon Inday

Nagdeklara na ng heightened alert status ang Philippine Coast Guard para mapaigting ang preparasyon sa paparating na Super Typhoon Inday partikular sa National Capital Region, Northeastern Luzon, Northwestern Luzon, at Bicol Region.

Inatasan ni PCG Commandant, Admiral Ronnie Gil Gavan ang lahat ng concerned Coast Guard Districts, Stations, at Sub-Stations na magpatupad na ng preparedness measures at makipag-ugnayan sa local disaster risk reduction and management councils at local government units.

Activated na ang preparedness and response measures ng Coast Guard sa ilalim ng Intensified Community Assistance, Awareness, Response, and Enforcement o i-CARE campaign nito.

Kabilang sa pinaghahandaan ang pagkakasa ng early evacuation sa mga residente na nasa high-risk coastal areas, paglalabas ng sea travel advisories, pagbabantay sa mga pantalan at iba pang Coast Guard facilities.

Pinayuhan ng Coast Guard ang publiko na i-monitor ang mga abiso tungkol sa lagay ng panahon. (DDC)