LTO umapela sa publiko irespeto ang mga tauhan ng gobyerno na ginagawa lang ang tungkulin

Naglabas ng pahayag ang Land Transportation Office kasunod ng viral video na nagpapakitang tila kinukuyog ng mga tao ang isang LTO personnel habang may tinitikitan na driver sa rally sa Quezon City.

Sa nasabing video, makikita ang mga tao na pinalibutan, binubulyawan at dinuduro-duro ang enforcer na iniisyuhan ng traffic violation ticket ang driver ng isang sasakyan na ilegal na nakaparada sa lugar.

Ayon sa pahayag ng LTO, ginawa lamang ng naturang personnel ang tungkulin nito sa ilalim ng mandato ng ahensya na ipatupad ang transportation laws.

Tiniyak din ng LTO ang patuloy nitong pagganap sa kanilang tungkulin partikular ang pagpapatupad ng transportation laws and regulations para protektahan ang kapakanan ng publiko.

Kasabay nito ay umapela ang ahensya sa publiko na irespeto at makipagtulungan sa mga government personnel na ginagampanan lamang ang kanilang trabaho.

Sa viral video makikitang kabilang ang isang konsehal sa Quezon City na naninigaw at dumuduro-duro sa LTO enforcer. (DDC)