Appointment sa Customs Official na pinsan ni BOC Chief Ariel Nepomuceno, kinuwestyon
Labag umano sa prinsipyo ng Nepotismo ang pagtatalaga sa isang opisyal ng Bureau of Customs na pinsan ni Customs Commissioner Ariel Nepomuceno.
Sa reklamong inihain grupo ng mga empleyado at stakeholders ng Bureau of Customs kay Finance Secretary Frederick Go, kinuwestyon ang Customs Personnel Order na nilagdaan ng Customs Chief kung saan itinatalaga nito ang pinsang si Intelligence Officer 3 Paul Oliver Nepomuceno – Pacunayen, bilang Field Station Chief ng Customs Intelligence and Investigation Service sa Port of Manila.
Nakasaad sa reklamo na sa ilalim ng 1987 Constitution, ang anumang civil service appointments ay dapat naka-base sa merito at kakayahan at hindi sa personal o familial relationships.
Malinaw din sa rules ng Civil Service Commission na pinagbabawalan ang appointing authority na bigyan ng paborableng appointment o pwesto ang kaanak na nasa loob ng “third degree of consanguinity” o “affinity”
Habang sa ilalim ng Anti Graft and Corrupt Practices Act, ang mga public officers ay hindi dapat nagbibigay ng unwarranted benefits o pabor sa kanilang kamag-anak.
Sinabi ng grupo ng mga BOC employee na ang pagkaka-assign kay Pacunayen bilang hepe ng CIIS-POM ay kwestyonable dahil kamag-anak siya ng Customs chief.
Ang Port of Manila ay ikalawa sa pinakamalaki at pinaka-kritikal na international gateway sa bansa at dito nagaganap ang higit sa kalahati ng global trade.
Iginiit ng mga nagrereklamo na ang pagkakatalaga kay Pacunayen sa asabing posisyon ay may epekto sa revenue protection, border enforcement at sa tiwala ng publiko sa BOC.
Sa parehong reklamo ay kinuwestyon din ang pag-demote sa isa pang opisyal ng BOC na si Troy Tan na mula sa pagiging Intelligence Officer 3 ay naging Intelligence Officer 1.
Pero sa kabila ng demosyon, parehong sahod pa rin umano ang tinatanggap ni Tan na malinaw umanong paglabag sa CSC Rules patungkol sa hierarchy.
December pa noong nakaraang taon nang ihain ang reklamo sa Department of Finance, subalit hanggang ngayon ay hindi pa ito naaaksyonan.
*Dahil dito, nagpasya na din ang mga complainant na iparating ang kanilang reklamo sa Office of the President, Office of the Ombudsman, Department of Justice, at National Bureau of Investigation.
Apela ng grupo, dapat agad imbestigahan ang kwestyonableng Personnel Order ng Customs Chief at patawan ng karampatang administrative at legal action ang mga opisyal na mapatutunayang nagkaroon ng paglabag.
