MMDA manghuhuli ng anti-littering violators sa Metro Manila

Sa pamamagitan ng paggamit ng closed-circuit television (CCTV) cameras ng Metropolitan Manila Development Authority (MMDA), huhulihin ng ahensiya ang mga lalabag sa anti-littering regulation sa buong Metro Manila.

Sinabi MMDA General Manager Usec. Nicolas Torre III na ang panghuhuli ay bilang bahagi ng pinaigting na kampanya para sa disiplina at kalinisan sa rehiyon.

Inaasahan ang pangkalahatang implementasyon ng nasabing polisiya sa susunod na linggo, habang inaayos pa ang guidelines at koordinasyon sa mga local government units (LGUs).

Ayon kay Torre, layunin ng hakbang na ito na matugunan ang patuloy na problema sa basura sa mga lansangan at mga estero, kung saan umaabot sa pitong tonelada ang nahahakot ng ahensiya. Aniya, makatutulong ang teknolohiya upang mas mabilis at patas na mapanagot ang mga violators.

“Ginagamit natin ang teknolohiya para maging patas at consistent ang enforcement,” ani Torre.

Kasabay nito, ipinakita rin ni Torre ang kakayahan ng Metrobase Command Center, kung saan matatagpuan ang monitors para sa mahigit 500 CCTV cameras kabilang ang AI-powered cameras na ginagamit sa real-time monitoring at pagtukoy ng mga violations sa No Contact Apprehension Policy (NCAP).

Samantala, sinubukan din ang Hotline 136 ng ahensiya, na may target na limang minutong response time sa mga insidente. Ayon sa MMDA, mahalaga ito upang agad na matugunan ang mga emergencies at iba pang ulat mula sa publiko.

Binigyang-diin ng ahensiya na ang mga hakbang na ito ay bahagi ng kontribusyon ng ahensiya disiplina program ng pamahalaan sa ilalim ng administrasyon ni President Ferdinand Marcos Jr. (Bhelle Gamboa)