Konstruksiyon ng bagong correctional facility sa Palayan City, Nueva Ecija, sisimulan na
Pinangunahan ng Bureau of Corrections (Bucor) ang groundbreaking ceremony para sa pagtatayo ng P470 milyong pisong halaga ng bagong correctional facility sa 60 na ektaryang lupa sa Palayan City, Nueva Ecija.
Ayon sa BuCor ang naturang pasilidad ay idinonate ng Panlalawigang Pamahalaan ng Nueva Ecija.
Binigyang-diin ni Bucor Director General Gregorio Pio P. Catapang Jr. ang importansiya ng pag-unlad at binanggit ang Republic Act No. 10575 na may mandato ang BuCor na magtayo ng karagdagang mga correctional facilities upang tiyakin ang makatao at ligtas naa pangangalaga, at epektibong pagbabago o repormasyon ng Persons Deprived of Liberty (PDLs). Aniya ang huling regional prison facility ay naitayo pa noong nakalipas na 53-taon sa Leyte sa panahin ng administrayson ni dating Pangulong Ferdinand Marcos Sr., ang ama ng kasalukuyang presidente.
Dinisenyo ang state-of-the-art facility para sa hanggang 7,500 PDLs at kabilang na rin d2 ang mahahalagang bahagi ng pasilidad ay ang Maximum, Medium, at Minimum Security Camps; Reception and Diagnostic Center; Drug Treatment and Rehabilitation Center; Correctional Institution for Women; Vocational and Livelihood Facilities; Agricultural Production Areas; In-facility Courtrooms; at Personnel Housing.
Kumpleto rin ito sa security features kasama na rito ang perimeter fence, elevated guard towers, kontrolado ang entry points na mayroong monitored checkpoints at access control systems,advance surveillance at communication technologies, at solar lighting.
Pinasalamatan ni Catapang si Nueva Ecija Governor Aurelio Umali at ang mamamayan ng Palayan dahil sa kanilang tiwala at kumpiyansang ibinigay sa BuCor at tiniyak nito na ang proyektong ito ay maghahatid ng malaking benepisyo sa ekonomiya ng Palayan City dahil sa inaaasahang libu-libong lokal na manggagawa ang magkakaroon ng trabaho.
Paliwanag nito kapag nagsimula na ang operasyon ng pasilidad, magiging permanente na ang mga trabahong malilikha para sa security personnel, administrative staff, medical professionals, at program coordinators.
Mararanasan din ng lokal na mga negosyo at suppliers ang pagtaas ng demand ng goods gaya ng pagkain,materyales, at iba pang mga serbisyo. Bukod pa rito ang inaasahang paglago ng imprastraktura kaasama na ang mga magagarang kalsada, utilities, at iba pang mahahalagang serbisyo na magpapaganda sa kapasidad ng lungsod.
Sa naturang inisyatibo, asahan na ang Palayan City ay magiging isang sentro ng kaunlaran ng bansa, at sustenableng paglago ng ekonomiya ng buong Nueva Ecija.
Target makumpleto ang correctional facility bago matapos ang taong 2027. (Bhelle Gamboa)
