Warehouse sa Tandang Sora, QC nasunog; 2 bumbero ang sugatan

Tinupok ng apoy ang isang warehouse sa Tandang Sora, Quezon City, Miyerkules (February 24) ng gabi.

Ayon sa Bureau of Fire Protection, laman ng warehouse ang mga panindang pambata gaya ng diaper, tissue, gatas at iba pa.

Nagsimula ang sunog alas 11:00 ng gabi na agad itinaas sa 5th alarm.

Umaga na ng Huwebes (Feb. 25) nang maideklarang under control na ang sunog.

Dalawang bumbero naman ang bahagyang nasugatan habang isang truck ng bumbero ang nasunog din ang bahagi ng windshield at side mirror.

Sa pagtaya ng BFP aabot sa P5 milyon ang halaga ng mga natupok na ari-arian.