OWWA nakiramay sa naulilang pamilya ng Pinoy seaman sa Strait of Hormuz

Sa gitna ng matinding pagdadalamhati, hindi nag-iisa ang pamilya ng ating kababayang seafarer na nasawi kasunod ng insidente sa Strait of Hormuz ayon sa Overseas Workers Welfare Administration (OWWA).

Sa pamamagitan ng OWWA Regional Welfare Office VII, personal na dinalaw ng OWWA ang naulilang pamilya upang ipaabot ang pakikiramay ng ahensiya, pakinggan ang kanilang mga pangangailangan, at alamin ang mga tulong na maaari nilang matanggap.

Tiniyak din ng OWWA na patuloy na gagabayan at susuportahan ang pamilya, kabilang ang pakikipag-ugnayan sa mga kinauukulang tanggapan upang matugunan ang kanilang mga alalahanin at maipagkaloob ang angkop na welfare assistance.

Sa panahon ng pangungulila, mahalagang maramdaman ng pamilya na may pamahalaang handang umalalay at may OWWA na kanilang masasandalan.

Nakikiramay ang buong OWWA sa pamilya at mga mahal sa buhay ng ating kababayang seafarer. (Bhelle Gamboa)