Publiko pinag-iingat ng NCRPO sa pagkuha ng kasambahay

Pinag-iingat ng National Capital Region Police Office (NCRPO) ang mga residente sa buong Metro Manila sa pagkuha ng mga kasambahay kasunod ng pagkakaaresto sa isang katulong na umano’y sangkot sa pagnanakaw ng mga alahas na nagkakahalaga ng ₱1.76 milyon mula sa kanyang mga amo sa Makati City.

Inihayag ni NCRPO Acting Director Police Brigadier General Christopher N Abrahano, na binibigyang-diin ng insidente ang kahalagahan ng masusing pagsusuri sa pagkakakilanlan, pagkatao, at rekord sa trabaho ng mga aplikanteng kasambahay bago sila pahintulutang makapasok at magkaroon ng access sa loob ng pribadong tahanan.

Ayon sa pulisya, unang itinanggi ng suspek ang pagkakasangkot sa insidente at iginiit na siya mismo ay naging biktima ng dugo-dugo scheme. Gayunman, narekober sa kanya ng mga imbestigador ang isang resibo ng transaksiyon sa pagpapalit ng foreign currency na nagkakahalaga ng ₱68,000.

Pinaalalahanan ni PBGen. Abrahano ang publiko na bagama’t mahalaga ang papel ng mga kasambahay sa pang-araw-araw na pagpapatakbo ng tahanan, kinakailangang magsagawa ng mga pag-iingat ang mga amo upang maprotektahan ang kanilang pamilya at mga ari-arian.

“Trust is important in any household, but it should be accompanied by vigilance. Verify the identity and references of people you hire, secure valuables, and avoid leaving large amounts of cash, jewelry, and other expensive belongings in easily accessible areas,” ani PBGen. Abrahano.

Inatasan din niya ang mga yunit ng pulisya na ipagpatuloy ang masusing imbestigasyon sa insidente at tukuyin kung may iba pang indibidwal na nakinabang o lumahok sa umano’y pagnanakaw.

Nagbabala rin ang hepe ng NCRPO sa pagtanggap sa mga pahayag ng mga suspek na maaaring ginagamit upang ilihis ang pananagutan, at binigyang-diin na kailangang mapatunayan ang mga paratang sa pamamagitan ng ebidensiya at alinsunod sa wastong proseso ng batas.

Hinimok din niya ang sinumang nakaranas ng kahalintulad na insidente na agad itong ireport sa pinakamalapit na himpilan ng pulisya sa halip na personal na komprontahin ang mga pinaghihinalaang sangkot.

“Protecting your home starts with being careful about who you allow into it. Be vigilant, take preventive measures, and report suspicious activities immediately. At the same time, let us allow investigators to establish the facts and ensure that accountability is pursued through the proper legal process,” pahayag ni PBGen. Abrahano. (Bhelle Gamboa)