DOLE nag-isyu ng work stoppage order sa clinic ng cosmetic surgeon na si Doc Yappy

Naglabas ng work stoppage order ang Department of Labor and Employment laban sa klinika ng kilalang cosmetic surgeon na si Dr. Eric Yapjuangco o mas kilala bilang si Doc Yappy.

Ayon kay Labor Secretary Francis Tolentino, nagsagawa ng inspeksyon sa The Icon Clinic kasunod ng mga alegasyon ng pagkakasangkot sa malpractice.

Matapos ang dalawang araw na inspeksyon, may nakitang paglabag sa klinika sa occupational safety and health kabilang ang kawalan ng required OSH program gaya ng Hazard Identification, Risk Assessment and Control framework; hindi pagsusumite gn OSH reports; kawalan ng sapat na safety personnel; at hindi pagkakaroon ng mandatory eight-hour OSH orientation para sa mga manggagawa.

Hindi rin nakasusunod ang klinika sa required workplace policies sa mental health, anti-sexual harassment at Committee on Decorum and Investigation gayundin sa pagkakaroon ng workplace lactation.

Sa isinagawang pagdinig, tiniyak naman ng management ng The Icon Clinic na itatama nito ang mga pagkakamali at susunod sa requirements sa loob ng itinakdang 20-day correction period.

Inatasan din ng DOLE ang The Icon Clinic na magsumite ng memorandum para sagutin ang inisyung work stoppage order sa loob ng 10-araw. (DDC)