TESDA, Amazon Web Services nagtutulungan para sanayin ang milyun-milyong Pilipino sa cloud at AI skills
Milyun-milyong Pilipino ang asahang magkakaroon ng libreng access sa mga kasanayan sa cloud computing at artificial intelligence (AI) sa pamamagitan ng pagsasama ng Technical Education and Skills Development Authority (TESDA) sa TESDA Online Program (TOP) ng mga globally recognized digital training courses ng Amazon Web Services (AWS).
Pormal na pinagtibay ng TESDA at AWS ang kanilang pagtutulungan sa pamamagitan ng Strategic Training Agreement (STA) noong Setyembre 29, 2026, sa TESDA Complex sa Taguig City. Nilagdaan ito nina TESDA Secretary Kiko Benitez at AWS Philippines Country Manager Precious Lim.
Sa ilalim ng kasunduan, magkakaroon ang mga Filipino learners ng access sa mga industry-leading training sa cloud at AI upang makatulong sa kanilang paghahanda para sa mas magandang oportunidad sa trabaho at career advancement.
Ayon kay TESDA Secretary Kiko Benitez, bahagi ang pakikipagtulungan ng ahensya sa patuloy nitong pagsisikap na gawing mas responsive ang technical education sa nagbabagong pangangailangan ng digital economy at matiyak na ang mga manggagawang Pilipino ay may kasanayang makatutulong sa pagkakaroon ng mas magandang kabuhayan.
“Skills development is ultimately about creating opportunities for people. Through this collaboration with AWS, we are giving Filipinos access to world-class cloud and AI training that they can use to build careers, pursue new opportunities, and contribute to the growth of our digital economy. Gusto nating masigurado na walang Pilipinong maiiwanan habang nagbabago ang mundo ng trabaho,” ani Sec. Kiko Benitez.
Sa ilalim ng kasunduan, mag-aalok ang TESDA at AWS ng mga kurso sa cloud at AI sa TESDA Online Program upang matulungan ang mga learner sa iba’t ibang antas na magkaroon ng in-demand skills para sa lokal at pandaigdigang industriya.
Kabilang sa mga pangunahing kursong isasama sa TOP ang:
Fundamentals of AI — Isang introductory course na tumatalakay sa mga pangunahing konsepto ng artificial intelligence, kabilang ang machine learning at mga aplikasyon ng AI. Hindi kinakailangan ang dating technical background upang makapag-enroll.
AWS Certified Cloud Practitioner — Isang foundational course na nagbibigay ng praktikal na kaalaman sa cloud, kabilang ang AWS services, security, architecture, at pricing, at nagsisilbing pathway tungo sa isang globally recognized certification.
AWS Certified AI Practitioner — Isang basic course na nagbibigay ng applied AI skills, kabilang ang responsible AI, generative AI, at praktikal na paggamit ng AWS AI services sa paglutas ng mga problemang nakikita sa aktuwal na sitwasyon.
Bukas ang mga training sa lahat ng Pilipinong may access sa TESDA Online Program. Walang prerequisite at walang bayad ang mga kursong available sa TOP.
Batay sa availability, ang mga learner na makakakumpleto ng certification-track courses ay maaaring mag-enroll sa TESDA Women’s Center upang ma-access ang structured learning pathways ng AWS Academy at maaaring maging eligible na makatanggap ng AWS certification vouchers na maaaring gamitin sa pagkuha ng AWS Certification exams.
Ang mga partikular na tuntunin, eligibility requirements, at anumang limitasyon sa certification vouchers ay nakabatay sa mga polisiya ng TESDA Online Program at AWS.
Ayon naman kay AWS Philippines Country Manager Precious Lim, ipinakikita ng pakikipagtulungan ang commitment ng AWS na palawakin ang cloud at AI capabilities sa buong bansa.
“Cloud and AI skills should be for everyone. Through this partnership with TESDA, we’re making world-class training available to every Filipino, whether they’re starting their career or embarking on a new one. When you remove the barriers of cost and access, you give an entire generation the tools to build a better future for themselves and their communities,” ani Lim.
Magiging available ang AWS digital training courses sa learning management system ng TESDA, kung saan maaaring direktang ma-access ng mga learner ang mga kurso sa loob ng TOP.
Nakatayo ang bagong kasunduan sa patuloy na pakikipagtulungan ng TESDA at AWS. Noong panahon ng COVID-19 pandemic, sinuportahan ng AWS ang TESDA sa pagpapalawak ng TOP sa pamamagitan ng cloud deployment, na nakatulong sa platform na matugunan ang lumalaking pangangailangan para sa online learning.
Sa mga susunod na hakbang, plano ng TESDA na magdagdag ng iba pang kurso mula sa AWS catalog, kabilang ang cloud architecture, security, databases, at iba pang technology domains.
Palalawakin din ang pakikipagtulungan sa pamamagitan ng industry-aligned training pathways, regional training events, at mas malawak na integration ng AWS content sa national network ng TESDA technology institutions at provincial training centers.
“At TESDA, we believe that skills transform lives. Ang cloud at AI ay hindi lang para sa mga nasa tech industry — ito ay para sa lahat ng Pilipino na gustong magkaroon ng mas magandang kinabukasan. This collaboration with AWS ensures that learning goes beyond the classroom and translates into real career opportunities, sustainable livelihoods, and a stronger, more competitive Filipino workforce,” dagdag ni Sec. Kiko.
Ang pakikipagtulungan ay alinsunod sa direktiba ni President Ferdinand “Bongbong” Marcos Jr. na mabigyan ang mga Pilipino ng globally competitive skills. (Bhelle Gamboa)
