Eat Bulaga Host inisyuhan ng show cause order ng LTO dahil sa pagmamaneho ng walang seat belt
Hindi nakaligtas sa Land Transportation Office ang online video ng Eat Bulaga hosts kung saan makikitang nagmamaneho ang host na si Ian Red nang walang seat belt.
Iniutos ni Assistant Secretary Markus Lacanilao ang pagpapalabas ng Show Cause Order laban sa rehistradong may-ari at driver ng sangkot na sasakyan.
Sa naturang video, makikitang minamaneho ni Ian Red ang sasakyan nang wala itong suot na seatbelt habang nire-record ng kanyang mga kasamahan ang kanilang pagkakantahan sa loob ng sasakyan.
Bumaba pa si Red sa sasakyan habang nasa kalsada, iniwang bukas ang pintuan nito, at muling sumakay.
Inaatasan din ng LTO ang rehistradong may-ari at si Red na humarap sa tanggapan ng Intelligence and Investigation Division sa Sept. 29 para sa isasagawang pagdinig.
Ppinagsusumite siya ng sinumpaang salaysay o paliwanag kung bakit hindi siya dapat managot sa mga posibleng paglabag gaya ng Failure to Wear the Prescribed Seatbelt Device at Reckless Driving.
Pinatawan na din ng 90 days preventive suspension ang kaniyang drivers’ license.
Nasisi naman ng netizens sina Maine Mendoza at Miles Ocampo na kapwa nagbahagi sa social media ng video nila sa loob ng minamanehong sasakyan ni Red. (DDC)
