Driver’s license ni Niño Muhlach pinatawan ng preventive suspension ng LTO

Nagpalabas ng Show Cause Order ang Land Transportation Office matapos ang aksidenteng kinasangkutan ng actor na si Niño Muhlach sa bahagi ng Marcos Highway, Antipolo City.

Ayon kay LTO Chief, Assistant Secretary Markus Lacanilao, batay sa imbestigasyon at mga nakalap na ebidensya, kabilang ang ulat ng Antipolo Component City Police Station, nawalan ng kontrol ang aktor sa minamaneho niyang sasakyan kaya nabangga nito ang tatlong establisimyento at isang nakaparadang motorsiklo, at isa ang nagtamo ng sugat.

Inamin din ng aktor na siya ang nagmamaneho ng sasakyan at kinilala ang kaniyang pananagutan sa insidente matapos umanong makatulog sya habang nagmamaneho.

Ayon sa LTO, kinakailangang humarap ang rehistradong may-ari at driver ng sasakyan sa pagdinig ng Intelligence and Investigation Division ng LTO sa August 28.

Habang nagpapatuloy ang imbestigasyon, inilagay na ng LTO sa alarm status ang sangkot na sasakyan at inatasan ang aktor na agad na isuko ang kanyang driver’s license sa IID.

Sasailalim na din sa 90-day preventive suspension ang lisensya ni Muhlach. (DDC)