Mga pamilyang apektado ng baha sa Sultan Kudarat agad inayudahan ng DSWD

Matapos ang ilang araw ng walang tigil na pag-ulan sa iba’t ibang bahagi ng Mindanao, maraming pamilya sa Sultan Kudarat ang napilitang lumikas makaraang bahain ang kanilang mga tirahan.

Mabilis na naghatid ng suporta ang Department of Social Welfare and Development (DSWD) Field Office (FO) 12 – SOCCSKSARGEN sa mga apektadong komunidad kabilang ang Columbio at Lambayong upang agarang tugunan ang kanilang pangangailangan.

Sa Lambayong, ipinamahagi ang 322 family clothing kits, 322 kitchen kits, 20 rolls ng tarpaulin at 25 modular tents na donasyon ng Government of China para sa mga residente ng Barangay Caridad at Penggiaman na labis na naapektuhan ng kalamidad. Samantala, sa Columbio, nakatanggap ang mga residente ng 100 FFPs, 39 RTEF boxes at 20 modular tents, na bahagi rin ng donasyon ng Government of China.

Malapit ang pakikipag-ugnayan ng DSWD sa mga lokal na pamahalaan at iba pang katuwang na ahensya para matiyak na agad na naihahatid ang kinakailangang tulong at serbisyo sa mga pamilyang apektado, lalo na sa mga nananatili sa mga evacuation center. (Bhelle Gamboa)