OFW Seafarers na naipit sa Gulo sa Lebanon Ligtas na nakauwi

Nakauwing ligtas sa Pilipinas ang siyam na overseas Filipino worker (OFW) seafarers na naipit sa Lebanon matapos maapektuhan ng umiiral na sigalot sa Gitnang Silangan.

Ang mga Pinoy seaman ay dumating sa bansa sakay ng Emirates Flight EK 332 matapos ma-stranded ng ilang buwang sa Lebanon. Ang mga marino, na bahagi ng tripulante ng M/V Hawk III, ay nanatiling hindi makauwi matapos ma-detain ang kanilang barko noong Oktubre 2025 at kalaunan ay maabutan ng lumalalang tensyon at armadong labanan sa rehiyon.

Sa kanilang pagdating sa bansa, sinalubong sila ng mga kinatawan ng Department of Migrant Workers (DMW), Overseas Workers Welfare Administration (OWWA), at kanilang manning agency upang mabigyan ng airport assistance at agarang suporta. Makatatanggap din sila ng post-arrival assistance at iba pang serbisyong makakatulong sa kanilang pagbangon matapos ang kanilang pinagdaanan. Samantala, hinihintay na lamang ang kumpirmasyon ng flight details ng 11 pang seafarers upang sila rin ay makauwi sa bansa.

Naging matagumpay ang repatriation sa pamamagitan ng koordinasyon ng DMW, OWWA, Migrant Workers Office (MWO) sa Lebanon, at ng Embahada ng Pilipinas sa Beirut. Sa ilalim ng direktiba ni Pangulong Ferdinand R. Marcos Jr., patuloy na pinagtitibay ng DMW ang pangako nitong tiyakin ang kaligtasan, kapakanan, at agarang pag-alalay sa mga OFW na naapektuhan ng krisis sa ibayong dagat. (Bhelle Gamboa)