1-Kilo na marijuana nakumpiska sa Las Piñas City

Nakumpiska ng mga operatiba ng Pamplona Police Sub-Station ng Las Piñas City Police Station ang isang kilo ng umano’y marijuana mula sa isang lalaking High-Value Individual (HVI) sa isinagawang anti-criminality operation sa Alabang-Zapote Road, Barangay Pamplona Uno.

Ang suspek ay kinilalang si alyas “Rigs,” 27-anyos.

Sa ulat ni Col Ricky P. Neron, Chief of Police ng Las Piñas CPS,nagsagawa ng Oplan Galugad patrol operations ang kanyang mga tauhan na nagresulta ng pagkaaresto ng suspek at nakumpiska ang umano’y marijuana leaves na nagkakahalaga ng ₱120,000.00, at eco-bag na pinaglagyan ng sinasabing ilegal na droga.

Nasa kustodiya ng pulisya ang suspek at mahaharap sa kasong paglabag sa

Comprehensive Dangerous Drugs Act of 2002.

“Ang matagumpay na pagkakasabat sa isang kilo ng marijuana ay nagpapakita ng kahalagahan ng patuloy na police visibility at anti-criminality operations sa ating mga komunidad. Mananatili tayong aktibo sa pagpapatrolya at pagpapatupad ng batas upang mapigilan ang pagkalat ng ilegal na droga at mapanatiling ligtas ang publiko,” pahayag ni BGen Glenn Oliver C. Cinco, District Director ng Southern Police District. (Bhelle Gamboa)