ES Recto, iba pang opisyal inireklamo ng plunder sa Ombudsman

Nagsampa ng reklamong plunder sa Office of the Ombudsman ang health advocate na si Dr. Tony Leachon laban kay Executive Sec. Ralph Recto.

Ang kaso ay may kaugnayan sa paglilipat sa National Treasury ng 60 billion pesos na excess funds ng PhilHealth.

Ginamit na batayan ni Leachon sa kaniyang reklamo ang 2025 Supreme Court decision.

Sa naging pasya noon ng SC, idineklarang unconstitutional ang special provision sa 2024 General Appropriations Act na nagpapahintulot na maibalik sa National Treasury ang sobrang pondo ng mga GOCC gaya ng PhilHealth.

Kasama din sa reklamo ni Leachon ang paglilipat sa National Treasury ng 107 billion pesos na pondo ng Philippine Deposit Insurance Corporation o PDIC.

Maliban kay Recto, respondent din sa reklamo sina Acting Finance Secretary Frederick Go, dating Acting Budget Secretary Rolando Toledo, PhilHealth President Edwin Mercado, dating PhilHealth chief Emmanuel Ledesma Jr., Health Secretary Teodoro Herbosa, at PDIC President Roberto Tan. (DDC)