3 Pinay biktima ng human trafficking sa Malaysia nakauwi na ng bansa

Ligtas na nakabalik ng bansa ang tatlong Pinay na nabiktima ng human trafficking sa Malaysia.

Ayon sa Bureau of Immigration, sa ilalim ng repatriation program ng gobyerno, dumating sa NAIA ang tatlo galing sa Kota Kinabalu.

Ang mga biktima na nasa edad 20 hanggang 30 ay magkakahiwalay na umalis sa bansa noong June 2025 sa pamamagitan ng illegal migration corridor sa Palawan kung saan sila sumakay ng bangka patungong Malaysia.

Pinangakuan sila ng trabaho bilang hotel receptionists at susweldo ng 100,000 pesos kada bwuan.

Gayunman, sa KTV bars sila dinala kung saan sila pinagtrabaho, pwersahang pinapainom ng alak at ang sweldo nila ay galing lamang sa tip ng customers.

Muli namang nagpaalala si BI Commissioner Joel Anthony Viado sa mga Pinoy na nagbabalak mag-abroad na maging maingat at tiyaking lehitimo ang inaalok sa kanilang trabaho. (DDC)