Dagdag-diskwento sa mga edad 70 pataas isinulong sa Kamara
Inihirit ni Senior Citizens Rep. Rodolfo Ordanes sa Kamara ang panukalang batas na magbibigay ng dagdag diskwento sa mga senior citizen na edad pitumpu pataas.
Sa House Bill 5187, ipinanukala ni Ordanes ang 5 percent na dagdag sa senior citizen discounts kapag sumapit sila sa edad na pitumpu, at dagdag ulit na 5 percent kapag sumapit sa edad na walumpu, siyamnapu at higit pa.
Ayon kay Ordanes, habang nagkakaedad ay pataas din ng pataas ang gastusin sa pagpapagamot kasama na ang maintenance medicines, mobility assistance, at iba pang pang-araw araw na kailangan.
Sa ngayon batay sa isinasaad ng Expanded Senior Citizens Act ang mga senior citizen ay mayroong 20 percent discount at exempted din sa pagbabayad ng value-added tax sa ilang bilihin at serbisyo.
