Dalawang dati nang nabiktima ng trafficking tinangka muling umalis ng bansa sa ilegal na paraan
Hinarang sa Terminal 3 NAIA ang dalawang pasahero na aalis sana patungong Bali, Indonesia bilang mga turista.
Ayon sa Bureau of Immigration, isinailalim sa secondary inspection ang dalawa na kapwa nagsabing mamamasyal lamang sila sa nasabing bansa.
Pero kalaunan, umamin din ang mga ito na ni-recruit sila para magtrabaho bilang Customer Service Representative at Online Gaming Live Streamer.
Nang busisiin sa record ng BI, dati na ding nabiktima ng trafficking ang dalawa noong 2024 makaraang lumabas sila ng bansa gamit ang backdoor para magtrabaho sa Cambodia.
Paalala ni BI Commissioner Joel Viado sa mga nagbabalak magtrabaho abroad, siguraduhing may valid silang dokumento. (DDC)
