Higit ₱91M halaga ng shabu at mga baril nakumpiska ng SPD, dating pulis at 4 iba pa arestado sa Parañaque City

Napasakamay ng Southern Police District (SPD) ang limang High-Value Individuals (HVIs) kabilang ang nagbitiw na pulis at nakumpiska ang mahigit ₱91 l-milyong halaga ng hinihinalang shabu at mga baril sa ikinasang buy-bust operation sa Sun Valley, Parañaque City.

Kinilala ang mga naarestong suspek na sina alyas “Bossing,” 35-anyos; alyas “James,” 49-anyos, isang resigned PNP member; alyas “Jezreel,” 29-anyos; alyas “Hazel,” 25-anyos; at alyas “Ricardo,” 48-anyos, pawang natukoy na bagong HVIs.

Ayon sa report, pinangunahan ng District Drug Enforcement Unit (DDEU-SPD) ang operasyon sa koordinasyon ng PDEA, DID-SPD, HPG-SOD/TF Limbas, RPDEU PRO-4A, RID PRO-4A, PDEG SOU NCR, PDEA Laboratory Service, Parañaque CPS SDEU, at Sub-Station 7 na nagresulta ng pagkaaresto ng mga suspek sa naturang lugar.

Nakumpiska ng otoridad ang tinatayang 13.389 kilo ng umano’y shabu at limang containers ng liquid crystalline substance na may Standard Drug Price na ₱91,045,200.00, dalawang caliber .45 pistols, isang Bushmaster rifle, ₱319,950.00 cash, at communication devices.

“This operation sends a clear message that no drug syndicate is beyond our reach. The Southern Police District will pursue those who distribute illegal drugs and ensure they are held accountable under the law,” sabi ni SPD Acting District Director Col Glenn Oliver C. Cinco.

Inihahanda ng otoridad ang pagsasampa ng kasong paglabag sa Comprehensive Dangerous Drugs Act of 2002 at Comprehensive of Firearms and Ammunition Act.

Nasa kustodiya ng pulisya ang suspek na nakatakfang sumailalim sa inquest proceedings. (Bhelle Gamboa)