Construction worker patay, 3 iba pa sugatan sa gumuhong poste ng itinatayong gusali sa BGC, Taguig City

Isang construction worker ang kumpirmadong patay habang tatlong iba pa ang nasugatan matapos gumuho ang isang poste ng itinatayong gusali sa Bonifacio Global City, Taguig City ngayong Lunes.

Ayon sa inisyal na report, dakong alas-11:00 ng umaga nangyari ang insidente sa 34th Street panulukan ng Lane D sa BGC.

Agad namang napasugod sa pinangyarihan ng aksidente si Taguig City Police Station Officer-in-Charge Col. Byron Allatog upang alamin ang sitwasyon sa lugar.

Batay sa ulat ng ground commander kay Col. Allatog, gumuho ang ginagawang core wall para sa elevator ng itinatayong gusali sa lugar kung saan nadamay ang apat na biktima.

Mabilis na isinugod ang mga biktima sa ospital subalit binawian ng buhay ang isang construction worker. Patuloy namang ginagamot ang tatlong biktima sa naturang pagamutan.

Nagsasagawa ng masusing imbestigasyon ang otoridad kaugnay nang nangyaring insidente. (Bhelle Gamboa)