Mga pulis nakatanggap na ng mid-year bonus; P7.7B na pondo inilaan sa mahigit 230,000 na uniformed at non-uniformed PNP personnel

Naipamahagi na ng Philippine National Police ang Mid-Year Bonus sa kabuuang 230,925 na uniformed at non-uniformed personnel.

Ayon sa PNP, umabot sa P7,726,103,239 ang pondo na inilaan ng Department of Budget and Management (DBM) para sa layuning ito, at direktang na-credit sa Landbank ATM payroll accounts ng mga kuwalipikadong makakatanggap.

Ang Mid-Year Bonus ay katumbas ng isang buwang basic salary at ibinibigay sa mga personnel na nakapaglingkod ng hindi bababa sa apat na buwan mula Hulyo 1 ng nakaraang taon hanggang Mayo 15 ng kasalukuyang taon, at nananatili pa ring nasa aktibong serbisyo sa nasabing petsa.

Sakop nito ang mga pulis, cadets, at Non-Uniformed Personnel ng organisasyon.

Binigyang-diin ni PNP Chief, Police General Rommel Francisco D. Marbil, ang kahalagahan ng bonus sa pagpapanatili ng mataas na morale ng buong hanay.

Ani Marbil, pagkilala ito sa dedikasyon at tapat na paglilingkod ng mga pulis at Non-Uniformed Personnel.

Samantala, ang mga personnel na may kinahaharap na kasong administratibo o kriminal na hindi pa nareresolba ay kuwalipikado pa ring makatanggap ng Mid-Year Bonus, maliban na lamang kung sila ay mapatunayang guilty sa pamamagitan ng final at executory judgment.

Kapag may pinal na hatol ng pagkakasala, hindi na sila maaaring tumanggap ng Mid-Year Bonus para sa taong iyon at kailangang isauli ang halagang kanilang natanggap.

Ngunit kung reprimand lamang ang parusang ipinataw, mananatiling karapat-dapat sa bonus ang naturang personnel. (DDC)