Mga Pinoy mas handa at mas matibay sa mga pagsubok ng 2021 ayon kay Pangulong Rodrigo Duterte

Bagaman napuno ng paghihirap at pagsubok ang nagdaang taon, marami pa rin namang dapat na ipagpasalamat ayon kay Pangulong Rodrigo Duterte.

Sa kaniyang New Year message sinabi ng pangulo, kabilang sa kailangang ipagpasalamat ay ang pagiging matibay ng bawat mamamayan na kinayang harapin ang mga pagsubok.

Ayon sa pangulo, mas matalino, mas matibay, at mas handa ang mga mamamayan sa mga pagsubook pa ng hinaharap.

Sa pagpasok ng Bagong Taong 2021, panibagong oportunindad ito ayon sa pangulo na magserbisyo sa publiko nang buong puso at may malasakit.

Sinabi ng pangulo na bagaman maraming nawalang buhay sa taong 2020 dahil sa COVID-19 pandemic, marami naman itong naidulot na aral.

Na-realize aniya ng bawat isa ang kahalagahan ng buhay at relasyon sa isa’t isa.

Mas naunawaan ang kahulugan ng pamilya, komunidad at bansa. At natutunan ang pangangalaga sa kapwa.

Ayon sa pangulo, nawa ngayong Bagong Taon bawat isa ay maging mapagpasalamat at palagiang gumawa ng mabuti. (D. Cargullo)