Lalaki naipit ang kamay sa gilingan ng karne

Isang lalaki ang isinugod sa ospital matapos maipit ang kamay nito sa gilingan ng karne sa Brgy. Tambo, Parañaque City.

Ayon sa Parañaque City Disaster Risk Reduction and Management Office, nakatanggap ng tawag ang kanilang Emergency Local Operations Center (ELOC) mula sa isang residente.

Humihingi ito ng saklolo para sa kasamahan nilang naipit ang kamay sa gilingan ng karne sa Brgy. Tambo.

Agad na nagpadala ng team ang ELOC at ang SAR Team sa pinangyarihan ng insidente.

Gamit ang rescue tools ay natanggal naman ang pagkakaipit ang kamay ng biktima.

Ang 24 anyos na lalaking manggagawa ay agad isinakay sa ambulansya at isinugod sa San Juan de Dios Hospital kung saan siya binigyan ng karampatang lunas.