Pekeng emergency alerts at panloloko ng nagpapanggap na pulis, ibinabala ng NCRPO
Nagbabala ang National Capital Region Police Office (NCRPO) sa publiko laban sa mga manlolokong sinasamantala ang takot at kagipitan sa pamamagitan ng pagpapanggap bilang mga pulis, pagpapakalat ng mga pekeng warrant of arrest, pagpapadala ng mga huwad na emergency alert, at paniningil ng pera kapalit umano ng pag-aayos ng mga kasong kriminal.
Inatasan ni NCRPO Officer-in-Charge Police Brigadier General Christopher N. Abrahano ang mga cybercrime unit ng mga police district at mga hepe ng himpilan ng pulisya na agad beripikahin ang mga ulat, imbestigahan ang mga hinihinalang kaso ng pagpapanggap at panloloko, pangalagaan ang mga digital na ebidensiya, at makipag-ugnayan sa mga kinauukulang ahensiya upang matukoy at mapanagot ang mga salarin.
“Criminals who use the name and authority of the police to frighten people into giving money or personal information will not be tolerated. We will pursue these schemes and hold those responsible accountable, but the public must also remain vigilant and verify suspicious claims before taking action,” ani PBGen. Abrahano.
Pinayuhan ng NCRPO ang publiko na maging maingat sa pagtanggap ng mga hindi inaasahang tawag, text message, email, o mensahe sa social media na nagsasabing sila ay may warrant of arrest, iniimbestigahan sa kasong kriminal, o saklaw ng mga umano’y emergency security directive.
Maaaring gumamit ang mga manloloko ng mga pekeng pagkakakilanlan, dokumentong kahawig ng mga opisyal na papeles, mga numero ng teleponong pineke upang magmukhang lehitimo, at mga mapanlinlang na online account upang paniwalain ang kanilang mga target.
Mariing pinayuhan ang publiko na huwag magpadala ng pera, magbigay ng mga password o one-time PIN (OTP), o mag-click sa mga kahina-hinalang link bilang tugon sa mga pagbabanta o paniningil. Dapat ding beripikahin nang direkta sa mga istasyon ng pulisya ang mga ganitong pahayag at ireport ang mga pinaghihinalaang panloloko.
Pinaalalahanan din ang mamamayan na itago ang mga digital na mensahe, numero ng telepono, detalye ng account, at mga screenshot na maaaring magsilbing ebidensiya sa imbestigasyon.
“Do not let fear dictate your decisions. Verify first, report suspicious activity, and never allow anyone to use the authority of the police to intimidate or defraud you. Our responsibility is to protect the public, and we will act against those who abuse the public’s trust,” aniya.
Muling tiniyak ng NCRPO ang patuloy nitong pangangalaga sa mga residente ng Metro Manila laban sa mga nagbabagong pamamaraan ng panloloko.
Hinimok din nito ang publiko na manatiling mapagmatyag, gumamit ng maingat na pagpapasya, at makipagtulungan sa mga awtoridad. (Bhelle Gamboa)
