NCRPO Chief sa mga police district, palakasin ang information dissemination sa responsableng pagmamay-ari at pag-iingat ng baril
Alinsunod sa direktiba ni Philippine National Police Chief Police General Jose Melencio Nartatez Jr., inatasan ni National Capital Region Police Office Officer-in-Charge Police Brigadier General Christopher Abrahano ang lahat ng police district at city police office sa Metro Manila na paigtingin ang kanilang kampanya sa pagbibigay ng impormasyon tungkol sa responsableng pagmamay-ari at ligtas na pag-iingat ng baril upang hindi mapasakamay ng mga hindi awtorisadong indibidwal kabilang ang mga menor de edad.
Ipinag-utos ni PBGen. Abrahano sa mga police unit na ilapit ang kampanyang ito sa mga komunidad sa pamamagitan ng regular na pakikipagdayalogo at pagsasagawa ng mga information session kasama ang mga opisyal ng barangay, mga magulang, mga awtoridad ng paaralan, mga lider ng kabataan, at mga lisensiyadong may-ari ng baril.
“We will emphasize that firearm ownership comes with a serious responsibility. Licensed firearm owners must ensure that their firearms and ammunition are properly secured and inaccessible to children and other unauthorized persons,” ani PBGen. Abrahano.
Binigyang-diin ni PBGen. Abrahano na mahalaga rin ang papel ng mga magulang at guardian sa pagtuturo sa mga menor de edad tungkol sa panganib na dulot ng mga baril at sa agarang pagre- report ng mga sitwasyon kung saan maaaring magkaroon ng access ang isang bata sa baril.
Aniya palalakasin din ng mga tauhan ng pulisya ang pakikipag-ugnayan sa mga opisyal ng barangay, paaralan, community organization, at mga kinauukulang yunit ng PNP upang matiyak na makararating hanggang sa mga komunidad ang impormasyon tungkol sa pag-iingat ng baril, legal na pagmamay-ari, at mga paraan ng pagre-report.
“The objective is not only to remind firearm owners of their legal responsibilities, but also to promote a culture of vigilance and prevention inside homes and communities,” pahayag ng NCRPO Chief.
Ayon kay PBGen. Abrahano, binibigyang-diin ng mga nangyaring insidente na kinasasangkutan ng mga menor de edad ang kahalagahan ng pagpapalawak ng kaalaman ng komunidad.
“We cannot wait for a tragedy to happen before we act. Through sustained information campaigns, community engagement, and responsible firearm practices, the NCRPO seeks to help prevent firearms from falling into the wrong hands and protect our children and communities from avoidable violence,” dagdag ng heneral.
Tiniyak ni PBGen. Abrahano na nananatiling nakatuon ang NCRPO sa pakikipagtulungan sa publiko, ngunit sinabing kailangan ng pulisya ang kooperasyon ng bawat isa.
“Firearm safety is a shared responsibility, and every responsible action taken at home and in the community can help save lives,” giit ni PBGen. Abrahano. (Bhelle Gamboa)
