Babae sugatan sa pananambang sa Makati City

Isang babae ang sugatan matapos pagbabarilin ng motorcycle riding suspects ang sasakyan ng biktima sa
Makati City ngayong Huwebes ng umaga.

Agad isinugod sa Makati Medical Center ang biktima na si alyas Ruby, nasa hustong gulang, residente ng Taguig City, sanhi ng tama ng bala ng baril sa hita.

Inaalam ng otoridad ang pagkakakilanlan ng dalawang suspek na nakasuot ng uniporme ng Move It, at magkaangkas sa pulang motorsiklo na walang plaka.

Sa inisyal na imbestigasyon, dakong alas-6:50 ng umaganangyari ang pananambang sa Chino Roces Avenue, harapan ng Unibank at BDO, katabi ng Oriental Place, Barangay Pio Del Pilar, Makati City.

Ayon sa report, minamaneho ni alyas Ruby ang kanyang puting Nissan Terra na may plakang CCB 2298 sa kahabaan ng Chino Roces Avenue nang biglang sumulpot ang mga nakamotorsiklong suspek sa tabi ng sasakyan ng biktima at agad siyang pinagbabaril na naging sanhi ng pagkasugat nito.

Mabilis na tumakas ang mga suspek sakay ng nasabing motorsiklo sa hindi batid na direksiyon.

Mabilis na rumesponde ang Sub-Station 3 ng Makati City Police Station matapos makatanggap ng tawag kaugnay sa naganap na insidente.

Posible umanong may kinalaman sa trabaho ng biktima ang nakikitang motibo.

Patuloy ang isinasagawang imbestigasyon at follow-up operation ng otoridad para sa ikadarakip ng mga suspek. (Bhelle Gamboa)